Media Center
الفرق بين معموديّة يوحنا ومعموديّة يسوع من كنيسة مار يوسف- المعمورة، سوريا
9 January 2024
ما الفرق بين معمودية يوحنا ومعمودية الرب يسوع
في معموديتين؟ اي نعم في معموديتين
يوحنا المعمدان ذات نفسو بيميّز
بين معموديتو ومعمودية الرب يسوع
هو بيقول: انا اعمّدكم بالماء، وياتي من هو أقوى مني،
ذاك الذي لا استحق ان أحل سيور حذائه
هو يعمّدكم بالروح القدس والنار
معمودية يوحنا للتوبة ولمغفرة الخطايا، للتطهير.
اما معمودية يسوع حتى يعطينا الروح القدس والنار .
الروح القدس هو روح الحقيقة، هو النور،
هو روح الحكمة، روح الفهم، روح العلم، روح المشورة، روح القوة، روح مخافة الله، روح التقوى.
النار: هو المحبة
المعمودية مش سحر، منزّل الولد بالمي ومنطالعو مسيحي
اخوتي
معمودية المي ما هي الا رمز لحقيقة كبيرة مخفية ورى طقس العماد
معمودية المي بتخلينا ننتمي للكنيسة المرئية ،
ومنتسجل بسجلات الكنيسة اننا مسيحيين،
ومناخد شهادة معمودية بتثبت انو تعمّدنا
اما معمودية الروح القدس بتخلينا ننتمي للكنيسة السرية mystique جسد المسيح السري
بيقول مار اغطسينوس:
في مسيحيين معمّدين ومش موجودين بالكنيسة،
وفي ناس مش معمّدين وموجودين بالكنيسة
عن اي كنيسة عم يحكي مار اغطسينوس؟
عم يحكي عن الكنيسة جسد المسيح السري
هادا بيفتحنا على موضوع الخلاص
السؤال: كل الناس اللي اجو قبل المسيح ومو معمّدين بيروحو عجهنّم وما بيخلصو؟؟
وكل الناس اللي ما بيعرفو المسيح وما تعمّدو بيروحو كمان عجهنّم ؟
اليهود والمسلمين والبوذيين والهندوسيين وباقي الديانات كلهون بيروحو عجهنّم ونحنا المسيحيين بس منروح عالجنة؟
اذا هيك القصة بيكون الرب يسوع غلّط برسالتو
وحاشا له ان يغلط او ان يخطئ.
يسوع اجى حتى يخلص كل انسان
مش حتى يعمل جماعة خاصة فيه منغلقة على حالها ومعتبرة حالها هي الشعب المختار
يسوع هو الشمس اللي بتنوّر كل الناس ، كل انسان،
لكن بيبقى على الانسان يفتح باب بيتو وشبابيك بيتو
حتى يدخل نور المسيح على حياتو
رح بتقللي: الرب يسوع قال من يؤمن ويعتمد يخلص ومن لا يعتمد يدان
صحيح وجدا صحيح
اي معمودية؟
معمودية المي او معمودية الروح القدس والنار ؟؟؟
يسوع اجى ليخلّص كل انسان وكل الانسان
يسوع ما اجى للمسيحيين بس ،
لكن اجى لكل انسان يبحث عن الحقيقة عن النور
لكل انسان بيعيش الاستقامة والمحبة
بيقول كارل راهنر اللاهوتي الالماني الكبير:
الروح القدس بيشتغل بقلب الانسان بطريقة نحنا منجهلها، وبيطبع وصاياه بقلب الانسان
طقس المعمودية بيدل على ايمانك وانتماءك للمسيح وللكنيسة
نحنا ما منولد مسيحيين، نحنا منصير مسيحيين لما مننفتح على نور الروح القدس، على الحقيقة، لما منعيش المحبة والانفتاح
كل انسان يبحث عن الحقيقة وبيعيش بالنور رح يوصل للمسيح متل المجوس
كل انسان بيعيش المحبة والرحمة بحياتو رح يوصل للمسيح متل قائد المئة
كل انسان بيعيش التوبة والندامة رح يوصل للخلاص متل اللص اليمين
المعمودية والميرون المقدس هني علامات حسية لحقيقة ايمانية كبيرة
بتخلينا نعيش ونعرف اننا ابناء الله واخوة ليسوع المسيح وهياكل للروح القدس
بالمعمودية والميرون منصير حاملين لنور المسيح ولرائحة المسيح الزكية
الرب يسوع المسيح بيعمدنا بروحو القدوس ونار محبتو حتى نشهد للحقيقة وندافع عن الحقيقة ونملي العالم من محبتو ونكون ابناء الله المحبة
Share this: