خطيئة العالم...

ما حدا بدو يسمع بالخطية ولا حدا بدو يشوف خطيتو ولا بدو يحس بخطيتو ولا بدو يعرف بخطيتو
هادا الخطاب ما بدنا اياه. بدنا الكنيسة تحكي عن المحبة والرحمة والغفران.

المسيح مزعج والكنيسة مزعجة والكاهن مزعج
بيقول مار فرنسيس: الحب غير محبوب
ومار اغسطينوس بيقول: أحبب وافعل ما تشاء

بدي حط كل الخطايا على جنب، وبدي اسأل سؤال واحد ما في غيرو:

يسوع طلب منا نحب بعضنا البعض متل ما هو حبنا.
طلب واحد طلبو منا. نحب.
انت عم تحب؟

ليكو معي ملا طلب. نحب.

عم تحب اخوك ابن امك وابوك؟
عم تحب جارك؟ صديقك؟ المسؤول عنك بالعمل؟ عم تحب وطنك؟ عم تحب حالك؟ عم تحب شغلك؟ عم تحب بيتك؟ مرتك؟ ولادك؟

شو هي خطيئة العالم؟
انو ما فينا واحد بيحب التاني ولا بيريد الخير للتاني
الخطية انو نبرر الخطية
ليش ؟ سألنا حالنا ليش ما منحب بعض؟ ليش ما منريد الخير للتاني؟
لما الله خلق الانسان، حط فيه قطعة زغيرة وخبى فيا لؤلؤة ثمينة كتير
ما علينا الا نفتح هالقطعة ونطالع اللؤلؤة
هالقطعة هي قلبك، واللؤلؤة هي المحبة، النور، الحقيقة، حضور الله، ملكوت الله.

ما عم نقدر نعيش وما عم نعرف نعيش لان مسكرين قلبنا وقافلين عليه.

المفتاح معك، اي معك انت، .... وينو؟ حريتك
ما عليك الا تتجرئ وتفتح قلبك وتكتشف النور اللي جواتك، تكتشف ملكوت الله بقلبك، تطالع جواهر المحبة اللي زرعها الله فيك

الرب يسوع حمل خطيئة العالم حتى نحمل نحنا الله
حمل خطيتي حتى احمل الله

مستقبل العالم، مستقبل بيتنا، ولادنا، عائلاتنا، وطننا، كنيستنا قائم علينا نحنا.

المسؤولية على كل واحد فينا، يا منطالع الكنوز المدفونة جواتنا ومنغتني فيها ومنغني العالم
او بتبقى مدفونة جواتنا، لا نحنا مسنتفيد منها ولا منخلي غيرنا يستفيد.

انتم نور العالم، انتم ملح الارض
احتفلنا بعيد الدنح الغطاس وعطانا الرب يسوع روحو القدوس
روح الحقيقة، روح الحكمة، روح الفهم، روح القوة، روح المشورة، روح مخافة الله، روح المحبة، روح التقوى

ما علينا الا نحمل مواهب الروح القدس ونعيش بنور المسيح ونحمل نور المسيح للعالم
هيك منكون شهود للمسيح، شهود للحقيقة، شهود للنور، شهود للمحبة

[back]