سر الاعتراف...

بيقول دكتور علم نفس بمونتريال:
لو الناس بتروح بتعترف كنا سكرنا عياداتنا

اعتراف هالدوكتور بيخلينا نعرف قديش مهم نروح نعترف ونحكي اللي بقلبنا للكاهن
اللي هوي مؤتمن على سر الاعتراف
وياما في كهنة استشهدوا حفاظاً على سر الاعتراف

سر الاعتراف هو من الاسرار السبعة اللي قليل ما الناس بتمارس هادا السر لعدة اسباب
١- البعض بيعتبر انو مش خاطئ..
شو عامل انا... ما عندي خطايا

٢- ليش بدي اعترف عندالكاهن: ما هوي انسان متلي متلو

٣- اذا بدي اعترف بعترف مني لله

٤- البعض بيخجل يعترف عندي كاهن رعيتو

قال الرب يسوع: “الحق أقول لكم كل ما تربطونه على الأرض يكون مربوطاً فى السماء، وكل ما تحلونه على الأرض يكون محلولاً فى السماء” (مت18: 18)
و قال لهم: “من غفرتم خطاياه تغفر له، ومن أمسكتم خطاياه أُمسكت” (يو20: 23)

ببداية الكنيسة كان الناس يروحوا يعترفوا للرسل ويتوبوا عن خطاياهون . اعمال الرسل 19-18
وحتى بالعهد القديم منشوف عند (ابن سيراخ4: 31):
لا تستحي أن تعترف بخطاياك”

١- مين منا مانو خاطئ ومين منا مانو بحاجة للغفران وللتوبة والرجوع للرب
بيقول الكتاب المقدس: البار يخطئ في اليوم سبع مرات
كل القديسين اللي بتعرفوهون كانوا من اكتر الناس اللي بيعترفوا بشكل دائم، لاحساسهن بالحاجة المستمرة لتنقية القلب وتطهير الفكر
متل ما نحنا بحاجة للحمام اليومي
كمان ارواحنا ونفوسنا بحاجة تتغسل من الخطايا والضعف البشري وقلة المحبة
بحاجة لمرافقة روحية وتوعية وارشاد روحي وعلاج حتى نتحرر من عبودية الخطية
اللي بيعمل الخطية بيكون عبد للخطية
بسر الاعتراف بيفكنا الكاهن من قيود الخطية وبيرجع بيربطنا بالله
بيرجّعنا بعلاقة البنوّة مع الله

٢- صحيح الكاهن انسان متلك وهو كمان خاطئ :
لكن ما تنسى انو الله اختارو واعطاه السلطان للحل والربط
متل ما بتروح لعند الدوكتور اللي ممكن يكون مريض وعند الثقة انو بيعالجك وبيشفيك
كمان الكاهن بيعالج روحك وبيشفيك روحك ونفسك

٣- بدك تعترف منك لله: لما عملت الخطية، ليش ما استحيت من حالك قدام الله اللي عم يشوفك؟
وما تنسى انو يسوع اراد انو نروح وعترف للكاهن اللي حامل سلطان الحل من خطاياك
حامل الروح القدس حتى يعطيك ياه
حامل محبة ورحمة الله الك

٤- بتخجل تعترف عند كاهن رعيتك:
بفهمك لكن تأكد انو الكاهن ما ممكن يفشي سر اعترافك
ولا ممكن تتغير نظرتو تجاهك
لان الكاهن طبيب الروح، همو يعرف وجع روحك حتى يداويك مش حتى يمسك عليك خطاياك ويفضحك
مش مجبور تعترف عند كاهن رعيتك ، لكن فيك تروح وتعترف عند الكاهن الي بدك ياه.
الكاهن هو اداة بيستخدمها يسوع ليفرجيك رحمة وحنان وغفران الله

مهما حكينا عن هالسر بيبقى عليك تروح وتختبر شخصياً جمال اللقاء والعودة لله متل الابن الضال اللي رجع واستقبلو ابوه

[back]