Media Center
الكنيسة وتحدّي الحداثة والعصرنة من كنيسة مار يوسف- المعمورة، سوريا
5 February 2024
الكنيسة ماهي دار إفتاء والكاهن ماهوي مفتي
الكنيسة المعاصرة، الايمان المعاصر، الكاهن المعاصر والمؤمن المعاصر
اكبر تجربة وتحدّي عم تعيشو الكنيسة اليوم هو الحداثة والعصرنة والاعلام
التطوّر والحداثة والعصرنة والاعلام عم يأثروا تأثير كبير
على عقل وتفكير الانسان وعلى طريقة عيش الانسان
منقول نحنا بالقرن ال 21 وصار لازم الكنيسة تتغيّر حتى تماشي العصر
العالم بدن كنيسة ما تحكي عن الخطية وجهنّم والدينونة
احكونا بس عن رحمة الله
العالم بدن كنيسة ما تحكي عن التوبة والندامة والرجوع الى الله
احكونا بس عن الله الرحوم والغفور والمحب البشر
العالم بدن كنيسة ما تحكي عن الصوم والصلاة
احكونا بس عن اهمية عمل الرحمة ومش ضروري نصلي ونصوم
فينا نصلي ونحضر القداس على التلفزيون والفيسبوك
العالم بدن كنيسة ما تحكي وتدين التسلّح والحروب والقتل
انتو كككنيسة بس صلوا من اجل السلام وضووا شموع
العالم بدن كنيسة ما تحكي عن الاجهاض وقتل الرحيم
والمثلية الجنسية والمساكنة والقمار والمخدرات الخ
انتو ككنيسة اذا بتحكو عن هالاشياء بتكونوا عم تدينو الناس وما بتحبوهون
العالم بدن يلبسو كيف ما بدهون عالكنيسة
يا ابونا ما بيصير تحكي عن الحشمة وتطفّش الناس من الكنيسة
صلواتنا وقداديسنا صارت استعراض
المهم هو التنظيم والشكل واذا الحضور كبير او لا
ونسينا انو الاهم هو الاحتفال بيسوع المسيح الاله
العالم بدهون الصوم على زوقهون
ومش ضروري الكنيسة تفرض علينا كيف نصوم
فينا نصوم عن شي منحبو متل الشوكولا والدخان والاركيلة...
العالم بدهون كاهن معاصر (مفتي) يلاقيلهون فتاوي وتحليلات
بدهون كاهن يرقص ويدبك ويغني وينكّت
مش ضروري تلبس توبك الكهنوتي ابونا
التوب ما بيعمل الراهب
العالم بدهون كاهن يعمل حفلات ورحلات وسهرات (متعهّد حفلات)
هيك بتشدّ الشبيبة وبتقربهون من الله ومن الكنيسة
العالم بدن الكاهن يعمل الكنيسة نادي اجتماعي
يقعدو ويحكو ويتسايرو
العالم بدن الكاهن يعمر كنيسة
بس ممنوع تحكي بالتبرعات وبالاشتراك وبالالتزام
العالم بدن الكاهن يتفهّم وضع الناس وظروف الناس
لكن العالم ما بدو يتفّهم رسالة الكاهن ورسالة الكنيسة
الحداثة والتطور بالكنيسة مش لازم يكون
على حساب العقيدة والايمان والاخلاق
الاصلاح الكنسي مفروض يكون على
نطاق القوانين الكنسية مش القوانين الالهية
الحوار بين الاديان بدو يكون كيف نعيش كأخوة
مش على حساب المسيح.
لا خلاص الا بيسوع المسيح.
انا مش ضد الحفلات والسهرات وتتلاقى الناس بالكنيسة
لكن ضد انو تتحوّل الكنيسة لنادي اجتماعي
ويكون هم الكنيسة اللقاء الانساني على حساب اللقاء مع الله
بدكن تقولو: ليش الكنيسة ماسكة السلّم بالعرض
لاء الكنيسة ماسكة السلّم بالطول لكن العالم ماشية بالعرض
ما بدنا كنيسة تساير العالم
لكن بدنا كنيسة تهزّ العالم
الكنيسة والكاهن مؤتمنين على العقيدة والايمان والاخلاق وعلى تعليم الانجيل
مجد الله وبنيان الكنيسة وخلاص النفوس هو الغاية من كل رسالة الكنيسة
Share this: