Media Center
عادات وتقاليد ورثناها دون تفكير من كنيسة مار يوسف- المعمورة، سوريا
12 February 2024
في مجموعة من العادات والتقاليد والمعتقدات الدينية
والاجتماعية والقبليّة والوطنية .... اللي ورثناها من دون تفكير وتحليل.
يعني ماشيين فيها على عماها
وممنوع حدا يدق فيها ويحكي عنها وينتقدها
وفي كم هائل من المجتمع اللي حاضر يدافع عنها
بسلمجرّد انك دقّيت بالمحرّمات
بعطي امثلة عن الجهل المقدس عنا نحنا المسحيين
1- منصلي للقديسين يشفونا بالوقت اللي هدول القديسين
كانوا يصلوا ليسوع يشفيهون
2- منركع قدام اضرحة القديسين
ومن النوادر ما نركع قدام القربان المقدس اللي هو يسوع المسيح
3- منركض ناخد زيت مقدس وتراب مقدس ومي مقدسة وبخور مقدس..
ومننسى نتناول القربان المقدس اللي هو يسوع المسيح
4- منلبس الصليب المقدس ومنحط معو خرزة زرقة تحمينا من العين
وكأنو الصليب المقدس ما ممكن يحمينا بدون الخرزة الزرقة
5- الطايفة اهم من الكنيسة
واعتبرنا انو الطايفة مساوية للكنيسة
انتقد الكنيسة ما حدا بيحكي
بس جرّب انتقد السريان او المورانة او الروم او اللاتين...
او جرّب انتقد الاورثوذكس او الكاثوليك او البروتستانت
وشوف المدافعين الحاضرين الناطرين للدفاع عن الطايفة
مع العلم انو 99.9999 بالمية منهون ما بيعرفو طريق الكنيسة
مشان ما قول ما بيعرفو شو الفرق
6- العيد عنا زينة ولبس وهدايا و وأكلات وعزايم....
والصلاة هي اخر شي منفكر فيه
7- منزعل انو كنيسة تسكرت بس ما عنا استعداد نروح نصلي
8- بحالة الوفاة منبطل نروح نصلي بالكنيسة خاصة بالعيد
9- منروح نصلي بغير كنيسة وما منتناول لانهون مو من طايفتنا
10- اذا شتت الدنيا بالجمعة العظيمة يعني عيدنا هو الصح
والامثلة تطول واللائحة تطول والجهل المقدس يستمر
على النطاق الوطني
1- تقديس وتأليه البشر ...
فيك تكفر بالله لكن ما فيك تكفر بانسان غني او الو اهميتو بالمجتمع لانو كم واحد عاطينو اهمية
بتقوم الدنيا وما بتقعد اذا بتتعرض للانسان لي بحقق مصلحة معينة
2- منعيش بالغرب عشرات السنين
ومنرفض نرجع نعيش ببلادنا المقدسة
وخلي حدا ينتقد الوطن المقدس
منتحوّل مباشرة لخونة واعداء وعملاء
3- بالغرب منحترم القوانين ومنحترم الوقت ومنحترم الاخر
وبس نرجع زيارة للوطن المقدس
من المطار منبلش نخالف القانون
ومن قبل ما نوصل الحدود منبلش نفكر كيف نرشي العسكري
وطبعاً القائمة تطول والجهل المقدس يستمر
نحنا للاسف اعداء المعرفة والحقيقة والفكر
نحنا اعداء كل شخص بيفكر برات الصحن
اعداء كل شخص ما بيمشي مع القطيع
اعداء كل شخص بيدق بهادا الجهل المقدس
بهادا الاله الوثني اللي عم نعبدو
على مر التاريخ عملت البشرية حروب مقدسة للدفاع عن مدن مقدسة باسلحة مقدسة عليها صور قديسين واسامي انبياء
نحنا شعب ما بيقرا واذا قرا ما بيفهم واذا فهم بيفهم غلط وعلى زوقو
شوّهنا صورة الله وصورة الدين والكنيسة
بجهلنا المقدس وبعصبيتنا المقدسة
بيقول البابا القديس يوحنا بولس الثاني
ليس اخطر من الجهل بالايمان الّا الايمان الجاهل
بيقول الرب يسوع:
اتبعوا الحق والحق يحرركم
Share this: